BR LA UNION – Nagpalagip iti National Historical Commission of the Philippines (NHCP) a maipawil a patukaren wenno kantaen kas pagliw-liwa iti National Anthem.
Inaramid ti komisyon iti palagip baben iti inruar na nga statement ita nga aldaw ti Martes, Abril 28, kalpasan a nakaawat da iti report seknan iti maysa a viral short-form video, ket makita a kankantaen da iti Pambansang Awit a “Lupang Hinirang” iti saan a maiparbeng a wagas iti maysa nga outdoor rave party.
Segun iti komisyon, maibasar iti inisyal nga imbestigasyon, posible a napasamak ti insidente idi Disyembre 2025 idiay Estados Unidos, isunga awan iti hurisdiksyon ti linteg ti Pilipinas ken saan a mabalin a maidatag ti legal nga aksyon.
Nupay kasta, pinalagipan ti NHCP dagiti Pilipino iti ballasiw taaw a dagiti national emblem wenno simbolo ti pagilian a pakaibilangan ti Lupang Hinirang ket protektado iti sidong ti Republic Act 8491 wenno Flag and Heraldic Code.
Nakailanad ditoy a rumbeng a kantaen ti Lupang Hinirang maibasar iti orihinal a panangputar ni Julian Felipe ket saan a mabalin nga usaren daytoy a liw-liwa wenno pagliw-liwaan.
Impaganetget ti komisyon a ti panangipakita ti patriotismo ket aramiden nga adda respeto, panagtulnog iti linteg, ken panangawat iti kultura.
Impalagip pay ti komisyon a ti waya-waya ti pagilian ket bunga ti sakripisyo dagiti banwar, isunga maiparbeng nga agbalin a responsable iti panangusar daytoy.
