BR LA UNION – Kinuwestiyon ti human rights lawyer a ni Atty. Dino De Leon iti kredibilidad dagiti 18 a nagpabigbig a sigud a Marines a nagtestigo iti panagdengngeg ti Senate Blue Ribbon Committee idi Huwebes, Hunyo 4, seknan dagiti anomalya a flood control projects.
Iti press conference idi Sabado, Hunyo 6, sinaggaysa ti abogado dagiti rason no apay a mapagdudua-an ti waragawag dagiti sigud a suldado.
Segun kenni De Leon, uppat kadagiti testigo ti awan ti rekordna iti Armed Forces of the Philippines, idinto nga adda dagiti “dishonorably discharged” manipud iti serbisyo.
Impaganetgetna ti kinarikut ti estoriada mainaig iti P805-billion a kickback manipud kadagiti flood control projects, a maipagarup a naikabil kadagiti maleta ken nai-deliver kadagiti nangato nga opisyal ti gobierno.
Kinuna pay ti abogado nga adu kadagiti testigo ti addaan ti saan a nasayaat a rekord ti panagulbod.
Binabalaw pay ni De Leon dagiti arigna “leading questions” kadagiti sigud a Marines, a kinunana a kasla “naensayo ken nasanayda” kadagiti sungbatda.
