BR LA UNION – Nangrugin nga agsagana iti National Capital Region Police Office (NCRPO) para iti panangipatungpal ti nair-irut a seguridad ngem nakapya a panagbantay para iti maika-lima nga State of the Nation Address (SONA) inton Hulyo ni Presidente Ferdinand R. Marcos Jr.
Nakatuding a mangiplastar ti National Capital Region Police Office iti deployment, traffic rerouting, ken addang iti civil disturbance management kadwa da ti naduma-duma nga ahensya tapno masiguro ti kinatalged dagiti dumar-ay ken uray dagiti mangisayangkat ti tignay-protesta iti aglawlaw ti Batasang Pambansa ken Commonwealth Avenue.
Segun kenni NCRPO Spokesperson PMAJ Hazel Asilo, nangrugi dan a makitaripnong kadagiti organizer ken stakeholders para iti naurnos nga SONA 2026.
Iti agdama, awan kunana iti namonitor da nga anyaman a security threat seknan iti SONA ni Presidente Marcos.
Nupay kasta, agtul-tuloy iti panagbantay ti NCRPO iti naduma-duma a threat group a pakairamanan dagiti mangisayangkat ti tignay protesta sakbay ken inton kaaldawan ti SONA ti presidente.
Kabayatanna, nangrugi metten iti Kamara de Representantes ken ahensya ti gobyerno nga agsagana para iti maikalima nga State of the Nation Address (SONA) ni Presidente Ferdinand Marcos Jr. a maisayangkat inton Hulyo 27, 2026 idiay Batasang Pambansa Complex.
Segun kadagiti opisyal, iti sentro ti maika-5 a SONA ket “simplicity” wenno panagbalin a simple.
Maipawil iti red carpet ken atiddog a gown ken maallokoy dagiti dumar-ay nga agsuot laeng ti simple ngem maiparbeng a kawes kas pannakikaysa iti agdama nga estado ti pagilian.
