BR LA UNION – Sap-sapolen itan ti National Bureau of Investigation (NBI) dagiti adda iti likod ti pannaka-hack iti sumagmamano a government websites ditoy pagilian.
Segun kenni NBI Director Melvin Matibag, nadetermina dan dagiti tattao a posible a karaman iti insidente ken siniguro na a pagsungbaten da dagitoy iti linteg.
Segun iti NBI nga itultuloy da iti imbestigasyon ken nalawag nga adda linabsing dagitoy a linteg.
Immuna ti daytoy, maysa a grupo a maaw-awagan ti Nullsec Philippines ti nangaklon a nag-hack ken binaliwan da ti sumagmamano a paset ti website ti gobyerno.
Maipagarop a nangibati da pay ti ballaag ken panangbabalaw iti Senado.
Kabayatanna, naipadamag nga uray ti website ti House of Representatives ket nabiktima ti kapada a cyber attack, ken nangibati da met laeng ti pammabalaw iti gobyerno seknan iti isyu ti korapsyon ken talek ti publiko.
Inlawlawag met ti Cybercrime Investigation and Coordinating Center (CICC) nga awan iti sensitibo nga impormasyon a naala dagiti hacker.
