BR LA UNION – Natakuatan ti nadakamat a departamento nga agus-usar dagiti Advance Persistent Threat Groups iti taktika a maawagan iti ‘Amplifiers’.
Imbinglay mismo ni Undersecretary Jeffrey Dy ti Department of Information and Communications Technology, imbes nga ag-hack, ti sentro dagiti hacker ket makuna itan a panangpaadu kadagiti kontrobersiyal nga online video contents.
Segun kenkuana, adda pay us-usaren nga analytics ti grupo tapno maammuanda no anya a video ti usarenda a mangiwaras iti palso nga impormasyon a panggepda a dadaelen ti maysa a kandidato.
Inlawlawagna, dagiti Advance Persistent Threat Groups a nadakamat ket saan nga ordinaryo a grupo a mangirug-rugi iti babassit a hacking ngem ti pangtada ket mabalin a mangapektar iti intero a pagilian.
Gapu iti daytoy, binallaagan ti opisyal ti publiko a saan a dagus nga ag-click wenno ag-react kadagiti makit-kita a post online gaputa, iti dadduma kadagitoy ket naigagara a maiwaras iti nadumaduma a social media platform tapno maala ti atensiyon ti maysa nga indibidual.
