BR LA UNION – Nagbalin a naannayas iti panaglukat ti klase iti Don Mariano Marcos Memorial State University–North La Union Campus (DMMMSU-NLUC) ket adda ti nasurok 3,000 nga enrollees ti nasao a panagadalan para iti School Year 2026–2027.
Nailukat ti klase babaen iti maysa a flag raising ceremony nga inatendaran dagiti estudyante, mangisursuro, empleyado ken opisyales ti DMMMSU-NLUC, agraman dagiti kameng ti Central Administration, Sericulture Research and Development Institute (SRDI), ken National Apiculture Research, Training and Development Institute (NARTDI).
Iti panagbetla ni Chancellor Junifer Rey E. Tabafunda, imbinglay na iti kinapateg ti gundaway ken oras a kaadda dagiti estudyante iti uneg ti unibersidad tapno pabaknangen ken palawaen ti ammo dagitoy babaen ti panagadal.
Impakita met ni Chancellor Tabafunda ti kinapasnek ti unibersidad tapno ipaay ti natalged ken dekalidad a panagadal dagiti estudyante.
Impanakkel ni Tabafunda ti pannakaitandudo ti DMMMSU-NLUC kas maysa a Most Eco-Friendly and Sustainable Campus ditoy pagilian.
Iti napalabas a tawen, naitandudo manen ti nasao a kampus kas Top 1 Performing School iti Licensure Examination for Agriculturists, a mangpatalged ti kinasiglat ti DMMMSU-NLUC.
Mainaig iti kalidad nga edukasyon, amin a kurso ti kampus ket addaan ti 100% Certificate of Program Compliance (COPC) manipud iti Commission on Higher Education (CHED), ken accredited ti Accrediting Agencies of Chartered Colleges and Universities in the Philippines (AACCUP).
Dagiti nasao a pammadayaw ket nagun-od babaen ti suporta ni DMMMSU President Dr. Jaime I. Manuel Jr. ken dagiti opisyales ti unibersidad.
Kabayatanna, inallokoy ni Chancellor Tabafunda dagiti saan pay a nagpa-enroll ken nangala ti admission test a saan pay a simrek, a mabalin pay dagitoy a sumrek iti pagadalan agingga biyernes, Hunyo 19, 2026.
