BR LA UNION – Aprubadon iti maudi ken pinal a panagbasa iti Sangguniang Panlalawigan ti La Union iti Provincial Ordinance No. 544 wenno ti “La Union Anti-Colorum Tourism Operations Ordinance of 2026” a mangpapigsa ti kampanya kontra kadagiti saan nga otorisado nga operasyon dagiti travel and tour agencies ditoy probinsiya.
Nakailanad iti ordinansa, masapol a ma-regulate iti operasyon dagiti travel and tour agency, a matakwatan a kolorum wenno iligal ti operasyon na.
Adda maipataw nga umiso a pannusa kadagiti aglabsing ti linteg.
Ti ordinansa nga indaulwan da Sangguniang Panlalawigan Members Alyssa Kristine B. Sibuma, Miguel Corleone B. Magsaysay ken Jeferson B. Fernando ket tapno maprotektaran dagiti lehitimo a tourism enterprise ken mapagtalinaed a natalged ken naurnos iti industriya ti turismo ditoy La Union.
Segun iti Sangguniang Panlalawigan, nabukel ti ordinansa kalpasan nga in-rekomenda ken naipresentar kabayatan ti konsultasyon nga inorganisar ti La Union Alliance of Travel and Tour Agencies wenno LUATTA.
Ibil-bilin ti ordinansa iti pannakabukel ti maysa a regulatory framework para kadagiti travel ken tour agencies ken nasken a maiparehistro ken regular a pannaka-monitor dagitoy.
