BR LA UNION – Nangiyebkas ti naimpuswan a panagyaman ti maysa kadagiti barangay kapitan idiay Agoo, La Union kalpasan a nakaawat ti multi-purpose vehicle kabayatan ti turnover ceremony a naisayangkat idi kalman, Martes, Hunyo 30, 2026, idiay Speaker Pro Tempore Francisco I. Ortega Convention Center, Brgy. Sevilla, Siudad ti San Fernando, La Union.
Manipud iti 49 a barangay idiay Agoo a naikkan ti lugan, ni Barangay Captain Jerry Estoque ti Barangay Macalva Norte ti maysa kadagiti nangted iti mensahe ti panagyaman.
Segun kenni Estoque, dakkel a tulong ti naipaay a multi-purpose vehicle para iti barangayda gaputa makatulong daytoy iti naparpartak ken mas epektibo a panagresponde iti panawen ti emerhensiya, kalamidad, medical transport, ken dadduma pay a serbisyo a kasapolan dagiti kalugaran.
Nangipeksa pay ti panagyamanna iti Gobierno Probinsiyal ti La Union gapu iti agtultuloy a panangipaayda iti suporta kadagiti barangay babaen kadagiti programa a mangpapigsa iti kabaelanda a mangipaay iti serbisio publiko.
