BR LA UNION – Agtultuloy a peggad ken parigat kadagiti motorista dagiti abut-abut ken nadadael a paset ti kalsada iti Umuna ken Maikadua a Distrito ti La Union.
Segun kadagiti motorista ken drayber, saan laeng a panangi-sakripisiyo ti kinatalged iti panagdalyasat da iti nadadael a kalsada iti inaldaw, ngem ketdi apektaranna pay ti pagbiaganda gapu iti posible a pannakadadael iti luganda.
Iti interview ti Bombo Radyo La Union, kinuna ni Nerfe B. De Guzman, tricycle driver ditoy siyudad, a dakkel a pakaseknan dagiti drivers ti agtultuloy a pannakadadael iti kalsada, agsipudta mabalin a pakaigapwanan ti kanayunan a panaggastos da, nu adda madadael ti lugan da gaputi saan a natalged a kalsada.
Kinunana a posible a mangigubway pay ti panag-peligro dagiti pasahero, partikular dagiti babassit a lugan a kas ti motorsiklo, iti panangliklik dagiti motorista kadagiti abut a mabalin a pakaigapwan ti aksidente.
Segun kenkuana, maawatanna a mabalin a narigat ti napaut a panagtarimaan iti kalsada, nangruna iti panawen ti panagtutudo, ngem impaganetgetna a napateg ti dagus a panagtignay tapno makissayan ti risgo kadagiti motorista.
Nadakamat na pay ti kinapateg ti umno a pannakaipasdek ti drainage system, nangruna kadagiti lugar a nalaka a malayos.
Kinunana a nu adda ti nangato a panaglayos iti kalsada, saan a makita dagiti abut ken bittak iti kalsada, a sigurado a paka-disgrasiyaan dagiti motorista.
Para kenni De Guzman, kasapulan a mapasayaat ken matarimaan dagiti drainage system tapno malapdan ti agtultuloy a pannakadadael dagiti kalsada ken ti nakaro a layus kadagiti naduma-duma a lugar partikular ditoy siyudad ti San Fernando.
