BR LA UNION – Kumidkiddaw ti tulong dagiti residente ti Barangay San Eugenio, Aringay, La Union, para iti pannaka-riprap iti paset ti waig nga asideg iti babbalay.
Segun kenni Narciso Ollero Estonanto, maysa a maseknan a residente ken nakauman ti Bombo Radyo La Union, impeksa na ti tarigagay da a masolosyunan ti nabayagen a parikot da a lumawlawa nga erosion ken landslide iti nasao a waig, a mabalin a paka-apektaran da a lumugar.
Kinuna na nga idi pay tawen 2020 nga ingkamang da ti problema iti maseknan nga opisyal ti ili ngem agingga ita ket maipagarop a saan pay daytoy a nataming.
Inbatad na a na-riprap ti sabali a paset ti waig ngem saan daytoy a maprotektaran iti nakaisaadan ti babbalay da.
Gapu iti daytoy, in-inut a kankanen ti danum iti daga ti sikiganda, nangruna nu napigsa ti tudo ken napegges ti ayus iti karayan.
Saanda laeng a madanagan iti pannakapukaw ti dagada, ngem ketdi madanagan da pay para iti seguridad ti pamilya ken pagtaenganda.
Segun kenni Estonanto, mapattapatta a pito a balay ti mabalin a maapektaran nu agtultuloy ti erosion ken saan a dagus a maipatungpal ti kasapulan a proyekto.
Maysa pay a residente ti agpan-panawagan a maipatungpal ti riprap wenno dadduma pay a kasapolan a wagas a mangprotektar kadakuada manipud iti layus ken landslide.
Impaganetget ni Jesus Aquino, a tarigagayda a maipaayan a dagus ti solusyon iti parikut da, agsipudta agpeligro iti kinatalged dagiti pito a pamilya nga asideg iti nasao a waig ken maamak da a mapukaw ti sanikua dagitoy a daga.
