BR LA UNION – Agtultuloy ti isay-sayangkat iti City Health Office (CHO) nga “Oplan Ligtas Tubig” a nangrugi idi Lunes, Agosto 10, 2026, tapno masiguro ti nadalus ken natalged a danum manipud kadagiti water sources, kas iti deep well ken bubon, nga us-usaren dagiti residente ditoy siyudad ti San Fernando iti inaldaw a panagkonsumo.
Inaramid ti CHO kalpasan iti nakaro a panaglayos ditoy siyudad idi napan a lawas, a ginubway ti bagyo ken habagat.
Impaganetget ni City Health Officer Dr. Michael C. Bangloy, nga immuna a tinutukan ti CHO dagiti low-lying barangay partikular dagiti asideg ti kabaybayan.
Idi Lunes, naisayangkat ti water disinfection kadagiti water source idiay Barangay Catbangen, Sevilla, ken Madayegdeg.
Naituloy idi Martes, Agosto 11, idiay Barangay Biday ken Barangay Parian, babaen ti panangipaay ti chlorine granules kadagiti residente.
Segun kenni Dr. Bangloy, agtultuloy iti water disinfection program tapno maprebentaran ti outbreak dagiti water-borne diseases kas iti diarrhea, a mabalin a patauden ti kontaminado a danum.
Tallo a team iti mangisaysayangkat ti programa ket manamnama a maileppas inton Agosto 31.
Inlawlawag ti CHO nga adda dua a klase ti water source dagiti residente – deep well ken danum a dumaldalan iti tubo.
Para iti deep well, mismo ti reservoir iti i-disinfect usar ti chlorine.
Kabayatanna, saan nga umno a direkta nga i-disinfect usar iti chlorine iti danum a dumaldalan kadagiti tubo. Isunga ipapaayan laengen ti CHO ti chlorine granules dagiti residente tapno isuda mismo ti mangikabil kadagiti bubon .
Para met kadagiti residente nga awanan ti access iti water refilling station ken saan pay a nadanon ti chlorination program, irekrekomenda ti CHO iti panagpaburek ti danum.
Addaan met dagiti barangay nga immuna nga inikkan ti CHO ti Aqua Tabs. Mabalin a dumawat ti publiko kadagiti barangay health station ken ilawlawag dagiti health workers iti umno a panagusar daytoy.
