BR LA UNION – Pormal nga inrugi idi kalman ti Association of Regional Campus Paper Advisers of Higher Education Institutions Region I, Inc (ARCPAHERI I) iti 24th Regional Higher Education Press Conference (RHEPC) nga agingga Pebrero 6, 2026 ditoy siyudad ti San Fernando, La Union.
Ti tallo nga aldaw nga aktibidad ket pakisalipan dagiti ginasut nga student journalist manipud kadagiti nadumaduma a Higher Education Institutions (HEIs) ditoy Ilocos Region, nga addaan tarigagay a pasayaaten iti paglainganda iti responsible journalism, creative writing, ken umiso a panangiwaragawag iti kangitingitan ti napartak a panagdur-as ti digital media.
Indauluan ti Keynote Speaker a ni Nico Joven Waje, maysa a Media and Communications Professional, iti conference a nangipaganetget iti kinapateg ti kinapudno, kredibilidad, ken etika iti journalism, kangrunaan kadagiti agtutubo a journalist.
Nakipaset pay iti komperensia dagiti siam (9) nga expert judges ken trainers, multi-awarded writers, educators, ken communication professionals, nga agserbi a kas evaluators ken mentor kadagiti makipaset.
Karaman kadagitoy ket da:
- Jan Adams Magtanong – Assistant Principal II, Magsaysay National High School
- Michael Escobar – Public Information Officer, LGU Sta. Maria, Ilocos Sur
- Irene Javillonar – SHS Master Teacher II, Tagudin National High School
- Marc Teomar Bautista – Faculty Member, Department of Communication, University of the Philippines Baguio
- Joselito Delos Reyes – Chairperson, Creative Writing Department, University of Santo Tomas
- Paul Joseph Nuval – Associate Professor, Department of Development Communication, Benguet State University
- Fe Esperanza Garcia – Poet at Reflective Literature Writer
- Jeff Cabal – Information Officer / Visual Communication Specialist, Philippine Merchant Marine Academy
- Shairalene Guerrero – Information Officer III, Media Affairs Office, Provincial Government of La Union
Dagiti kategorya a paglalabanan dagiti participants ket ti news writing, feature writing, editorial writing, literary categories, photojournalism, broadcasting, ken dadduma pay.
Nairanta ti aktibidad tapno makapatanur iti nalalaing a campus journalist iti rehiyon, nga agserbi a pannakabagi ti Ilocos Region iti 21st Luzonwide Higher Education Press Conference (LHEPC) a maangay idiay siyudad ti Tuguegarao inton Marso 2026.
