Insubmitir ni Department of Health (DOH) Secretary Ted Herbosa ti resignation-na ken ni Presidente Ferdinand Marcos Jr. ita a Lunes, Hulio 13.
Maibasar iti kopia ti surat, kinuna ni Herbosa a kalpasan ti knee replacement surgery, naamirisna a masapul nga ipangrunana ti salun-at daytoy.
Segun iti sekretario, dumalan isuna iti intensive rehabilitation iti las-ud ti tallo agingga uppat a bulan.
Nagpadispensar met daytoy iti asinoman a mabalin a napaay na bayat ti panagtakemna.
Iti agdama, kidkiddawen ti Bombo Radyo ti statement manipud ti DOH Spokesperson ken Undersecretary a ni Albert Domingo mainaig iti naipadamag a panagresign ni Herbosa.
Awan pay laeng ti opisial a kumpirmasion manipud iti Malacañang.
Maipalagip a pinasingkedan ni DOH Spokesperson ken Undersecretary Albert Domingo naka-sick leave ni Herbosa sipud idi Hulio 6 kalpasan a nagpaisidong iti knee replacement surgery.
Segun kenni Domingo, nagballigi iti operasyon ken agdama a maipaspasidong ti physical therapy ken rehabilitation iti sekretario.
Iti agdama, temporario nga agserserbi ni DOH Spokesperson ken Undersecretary Albert Domingo kas officer-in-charge ti Department of Health.###
