Target ti gobyerno a maibaba iti impataw a taripa ti Estados Unidos kadagiti produkto a Pilipino, iti nakatuding a panagtaripnong da President Ferdinand Marcos Jr. ken US President Donald Trump inton Miyerkoles, Nobyembre 18.
Segun kenni Trade Secretary Cristina Roque, kabilang dagiti kangrunaan a talantanen ti dua a lider iti 12.5% tariff nga impataw ti Washington kadagiti produkto nga ilu-luwas ti Pilipinas idiay US.
Kinuna ni Roque, tarigagay ti gobyerno a maipababa ti nasao a taripa tapno lalo a mapalawa iti exports ti pagilian, saan laeng nga iti merkado ti Amerika ngem uray iti dadduma pay a sangalubongan a merkado.
Kinuna na a tarigagay da a mapapigsa iti kabaelan dagiti produkto a Pilipino a maki-ginniddan iti international market.
Maipalagip nga imbasar ti Estados Unidos iti panangipataw na ti taripa iti maipagarop a pannakapaay ti Pilipinas a masungbatan ti panagserrek dagiti produkto a napartuat babaen ti forced labor.
Mainaig ti daytoy, impaganetget ni Roque a naidanon metten iti biang ti US iti Joint Administrative Order (JAO) ti gobyerno a nairanta a mangsungbat kadagiti nasao a pakaseknan.
Mangnamnama iti sekretaryo nga agbalin a paset daytoy iti panangtalantan ti posible a panangbaliw iti agraraira a taripa.
Kabayatanna, manamnama a sumangpet idiay Manila ni Trump inton bigat, Martes, Nobyembre 17, kasaruno ti panagdar-ay na iti kangrunaan nga aktibidad ti ASEAN Summit ken sakbay ti nakatuding a bilateral meeting da kenni Marcos.











