ROSARIO, LA UNION – Balligi nga insayangkat ti Rosario District Hospital (RDH), kadua ti Provincial Health Office (PHO), iti umuna a batch ti Lactation Management and Essential Newborn Care (LMENC) Training manipud Hunio 29 agingga Hulio 1, 2026 tapno papigsaen iti kabaelan dagiti healthcare workers iti panangipaay ti dekalidad a panangtaripato kadagiti ina ken kapaspasngay a maladaga.
Indauluan ni Dr. Michelle Arellano, kadua ti Breastfeeding Committee, iti tallo nga aldaw a panagsanay a dinar-ayan dagiti healthcare workers. Nagserbi a resource speakers dagiti nangibagi ti PHO ken dadduma pay a medical staff.
Natalandan iti panagsanay iti umno a panangasikaso iti lactation, essential newborn care, infection prevention, thermal protection, nutrision, ken dadduma pay a napapateg nga interbension iti maternal ken newborn health. Nangisayangkat met dagiti demonstrasion tapno ad-adda a mapatanor iti kinalaing dagiti nakipaset.
Paset ti LMENC Training iti agtultuloy a panagregget ti RDH ken PHO a mapasayaat iti kalidad ti maternal ken newborn healthcare services iti probinsia babaen ti agtultuloy a panagsanay ken pannakitinnulong.###
