Nakatuding a desisionan ti Sandiganbayan Second Division iti mosion nga ikkaten kas co-accused ni sigud a Department of Public Works and Highways (DPWH) Secretary Manuel Bonoan ken aramiden nga state witness iti flood control case kontra kenni Senador Jinggoy Estrada.
Daytoy ket kalpasan a makumpleto ti Second Division dagiti oral arguments mainaig ti mosion.
Segun kenni Second Division Chairperson Geraldine Econg, irev-review pay ti korte dagiti sumagmamano a napapateg a saritaan tapno masigurado a maitunos iti linteg iti agbalin a resolusion. Kenunana, no kasapulan iti pormal a discharge process, rumbeng daytoy a mailawlawag ken maikkan-rason ti prosekusion.
Innayon pay ni Econg, kasapulan met a paneknekan dagiti prosecutor a napateg iti testimonia ni Bonoan iti kaso ken saan isuna ti “most guilty” kadagiti akusado. Innayon na pay a nakapilan para iti resolusion ti mosion, ngem awan pay ti inkeddeng da a petsa no katno daytoy a mairuar.
Indatag ti Office of the Ombudsman iti mosion kalpasan a nagperma ni Bonoan iti maysa a cooperation agreement tapno tumestigo para iti prosekusion. Dinakamat met ti mosion iti kumapkapsot a salun-at ti sigud a sekretario, nga agtaltalinaed nga adda iti hospital arrest iti PNP General Hospital.
Nakapila met iti kapada a mosion iti Sandiganbayan Fifth Division, no sadino agpada nga akusado da Estrada ken Bonoan.###
