Dumanonen ti walo iti kumpirmado a pimmusay bayat a 34 a tattao iti mapukpukaw kalpasan ti landslide a napasamak iti Pengshui County, siyudad ti Chongqing, China idi Biyernes, Hulyo 17. Agtultuloy ti search and rescue operations dagiti autoridad iti namnama nga adda pay ti mabirukan da a nakalasat.
Segun kadagiti report, napasamak ti landslide agarup alas-9:08 ti bigat, a nanggabor kadagiti sumagmamano a residential building ken nangigubuay ti nalawa a panagbakuit dagiti residente kadagiti kabangibang a lugar.
Nasurok a 1,100 a residente iti naiyakar kas panagannad bayat a nasurok 800 rescue personnel iti naideploy iti lugar.
Inreport dagiti otoridad a sumagmamano a biktima iti nairuar manipud iti uneg dagiti reggaay, karaman dagiti nadangran a dagus a naiturong iti ospital.
Agtultuloy met a sumangsango iti peggad dagiti rescue team gapu ti saan a natibker a daga ken posibilidad ti kabaruan a panagreggaay.
Mapapati a dagiti napipigsa a panagtudo iti nangpataud ti landslide iti kabanbantayan a paset ti Pengshui County, nga adda iti murdong ti Hubei ken Guizhou provinces.
Inbilin met ni Chinese President Xi Jinping iti napartak a search and rescue operations ken iti panangisayangkat ti nainget nga imbestigasion iti rason ti insidente.###
