BR LA UNION – Nagbalinen a bagyo ti low pressure area iti daya ti Southeastern Luzon ket maawagan a bagyo “KIYAPO”.
Naudi a nasaripatpatan ti Tropical Depression KIYAPO iti kaadayu a 1,080 km daya ti Southeastern Luzon.
Kabuyog na ti angin a 45 km/h asideg iti sentro ken kapegges a dumanon iti 55 km/h.
Dup-dupagenna iti amianan a palaud iti kapartak a 25 km/h.
Naipangato a dagus ti Tropical Cyclone Wind Signal No.1 iti sumagmamano a lugar iti Luzon:
- Eastern portion ti mainland Cagayan (Santa Ana, Gonzaga, Lal-Lo, Gattaran, Baggao, Peñablanca, Santa Teresita, Buguey)
- Eastern portion ti Isabela (Maconacon, San Pablo, Cabagan, Tumauini, Ilagan City, Divilacan, Palanan, San Mariano, Dinapigue)
Maibasar iti forecast track ti PAGASA, umasideg ti bagyo wenno ag-landfall idiay Babuyan Islands inton rabii ti Biyernes (July 24).
Posible met latta ti landfall scenario idiay mainland Cagayan.
Kalpasanna, agturong iti Luzon Strait ken mapatta-patta a rumwar iti Philippine Area of Responsibility inton agsapa wenno malem ti Sabado (July 25).
Mapatta-patta a pumigsa ti bagyo Kiyapo iti tropical storm bayat ti panagballasiw na iti Extreme Northern Luzon inton Biyernes ken lalo a pumigsa ken agbalin a severe tropical storm sakbay nga umasideg iti Northern Luzon.
