BR LA UNION – Rinugyan ni Presidente Ferdinand Marcos Jr. ti maika-lima nga State of the Nation Address (SONA) na idi kalman, Hulyo 27, 2026 babaen iti panangibaga na a naidataganen ti kaso iti sumagmamano nga opisyal, mammanday linteg ken kontraktor seknan iti kinakusit iti flood control projects, nga immunan nga inbutaktak ti Presidente iti maika-uppat a SONA na.
Dinakamat na a nupay nasakit para kenkuana kas kabagyan, ngem manamnama a kabilang ti kasinsinna a ni sigud nga House Speaker ken Leyte Rep. Ferdinand Martin Romualdez kadagiti sumaruno nga idatagan ti kaso ti Ombudsman gaputi anomalya iti flood control projects.
Impaganetget ti Presidente, a saan a Presidente ti pamilya na ken kakabagyan, ngem ketdi Presidente isuna ti Pilipinas ket adda kadagiti umili ti pagrebbengan na.
Kinuna ti Presidente, amin a nasubbot a kuwarta manipud iti kinakusit ket naisubli iti kaha ti gobyerno ken siniguro na nga agtultuloy ti panagtulid ti hustisiya.
Kalpasan ti SONA, nangipaay met a dagus ti statement ni Romualdez ket aminado a nasakit para iti pamilya da ngem ires-respeto na iti nagbalin a posisyon ti Presidente.
Kinuna na a kaatnuman ket saan a kimiddaw ti pabor wenno espesyal a panangtrato.
Segun kenni Romualdez, takderanna nga awan ti linabsing na a linteg ken nakasagana a paneknekanna daytoy iti umno a proseso.
Nupay pudno a narigat para iti Presidente nga ituloy dagiti kaso nga adda pakainaiganna dagiti nasinged kenkuana, impaganetget na a pagrebbengan ti gobyerno nga ipatungpal ti umno ken i-respeto ti linteg.
