BR LA UNION – Maipagarop a desperado iti China ken Chinese envoy iti panangiwaras ti biddut ken peke nga impormasyon seknan iti West Philippine Sea.
Segun kenni Philippine Coast Guard Spokesperson for the WPS, Rear Admiral Jay Tarriela, agsasaruno iti ar-aramiden ti Chinese Embassy idiay Manila a panangiruar ti biddut nga impormasyon kas paset ti disinformation para iti panang-gamgam da iti pagin-innagawan a kabaybayan.
Sinubliyanan ni Tarriela ti maipagarop a pammadakes da Chinese Ambassador to the Philippines Jing Quan ken Deputy Spokesperson of the Chinese Embassy Guo Wei kontra kenkuana, kas kapigsaan a boses ti Pilipinas kadagiti isyu idiay WPS.
Kinuna na nga uk-ukagen da iti maipagarop a panangaramat na idi ti satirical images ken ibagbaga da a binastos na ni Chinese Pres. Xi Jinping.
Nupay kasta, ti nasao nga imahe kunana ket saan a maikumpara iti kalawa ti panag-bully ti China, panang-gamgam kadagiti teritoryo ti Pilipinas idiay WPS, ken dadduma pay nga harassment activities ti nasao a pagilian kontra kadagiti Pilipino.
Kabayatanna, kasaruno ti nagbalin a diskusyon iti baetan da Admiral Tarriela ken Sen. Robin Padilla seknan iti kontrobersiyal a racist video nga inruar ti Chinese state media, imbaga ni Tarriela a saan da pay a personal a nagsarita iti senador.
Kinuna na nga awan ti personal a susik da kenni Padilla, ngem saan a maiparbeng kunana ti nagbalin a waragawag ti senador seknan iti nasao a video, isunga rumbeng laeng a kuwestiyunaran na daytoy .
Mangnamnama ni Tarriela a maawatan ni Padilla ti posisyon na kalpasan ti inaramid na a palawag.
