Pagan-annaden ti Department of Health (DOH) iti publiko kontra ti leptospirosis iti tengnga ti agtultuloy a panagtudo ken panaglayos iti pagilian.
Iti statement, pinaregta ti ahensia iti publiko a liklikan a lumusong iti danom ti layos. No saan daytoy a maliklikan, maibalakad iti agsuot ti botas ken dadduma pay a proteksion iti bagi, karaman iti panag panagkonsulta iti doktor para iti umno a balakad ken reseta, karaman ti Doxycycline prophylaxis.
Segun kenni Palace Press Officer Undersecretary Claire Castro, saan a rumbeng nga urayen a kumaro dagiti sintomas kas iti gurigor ken panagdilaw dagiti mata wenno kudil sakbay nga agpakonsulta para iti posible a leptospirosis.
Immunan a binilin ti Palasyo ti Malacañang iti DOH a mangisayangkat dagiti proaktibo nga addang kontra kadagiti sakit a mabalin a maala manipud iti panagtudo ken panaglayos.
Inallukoy met ti gobierno dagiti lumaslasat iti layos a mangisayangkat ti maitutop a panagannad ken agpakonsulat iti kaasidegan nga heath center no kasapulan.
Mabalin met nga umawag iti National Emergency Hotline a 911 para iti dagus a tulong.###
