Posible a masuspinde wenno maibabawi iti lisensia ti aktor a ni Derek Ramsay ken ti negosiante a ni Anthony Jude Violago gapu iti mapapati a panagaramat da ti peke a plaka iti maysa a Porsche 918 Spyder.
Segun ti Land Transportation Office (LTO, nangrugi iti imbestigasion kalpasan a makita iti social media iti nasao a lugan nga addaan ti plaka a saan a maitunos iti opisial a rehistro. Maibasar iti inisial nga imbestigasion, ni Violago iti mangimanmaneho ti lugan ken maipagarup a nangikabit ti plaka a kapada ti inisials na nga “AJV” bayat nga us-usaren na daytoy para iti maysa nga event.
Nakarehistro pay laeng kenni Ramsay iti Porsche gapu ta saan pay a naiyalis iti nagan ni Violago iti rehistro kalpasan a nailako daytoy kenkuana. Insukon dagiti dua iti lugan iti LTO, bayat nga insuko met ni Violao iti driver’s license na.
Nagkiddaw ti dispensar ken inaklon dagiti dua iti nagbiddutanda.
Kabayatanna, nakalanad iti LTO issuances a maiparit iti panagusar ti peke wenno saan nga otorisado a plaka. Innayon ti ahensia a ₱5,000 iti multa para iti saan nga umno a panangikabit ti authorized motor vehicle license plate, bayat a dagiti dadduma a dusa ket nakadependir iti agbalin a resulta ti kaso ken desision ti LTO.
Nabilin da Ramsay ken Violago a sumango iti LTO Intelligence Division inton Agosto 24 tapno ilawlawag iti dasigda. Nupay kasta, segun ti ahensia, nagpakita dan idi Agosto 17 mainaig ti show-cause order. Agdama met a nakapasidong iti 90 nga aldaw iti suspension ti lisensia ni Violago.###
