Pinasingkedan ti Philippine National Police iti panagdengngeg iti Senado nga adda iti motibo ti estudyante a suspek iti pammaltog sadiay Ateneo de Zamboanga University (AdZU).
Iti panagdengngneg ti Senate Committee on Women and Children ket kinuna ni Zamboanga City Police Director Police Colonel Fidel Fortaleza a maysa iti im-imbestigaran da ket nu kasatno a naiserrek dagiti dua a lisensyado a paltog iti uneg ti unibersidad.
Maibasar iti inisyal nga imbestigasyon, naglugan iti Grade 8 student ti maysa a pickup truck nga addaan ti bag a naglaon kadagiti paltog. Imbes nga idiay main gate a naidalan, nu sadinno ket adda dagiti security guards, naibaba isuna sadiay ramp area a basbassit dagiti agbanbantay a security personnel.
Kinuna pay ti PNP a ti estudyante ket nangipakita iti galad nga addaan iti intensyon a liklikan dagiti security checks tapno maiserrek dagiti paltog.
Segun kenni AdZU Board of Trustees Chairman Pedro Rufo Soliven, maus-usar iti rampa para kadagiti persons with disability ken estudyante nga addaan iti injury. Aganay 25 a security guards met iti nakadutok kadagiti nagduduma nga entry point ti pagadalan.
Idi nakastrek sadiay Junior High School building, nagdiretso iti suspek nga estudyante iti fourth floor. Nagpaltog isuna iti Room 405 sakbay nga immakar iti Room 404, nu sadinno ket napatay na ti pada na nga estudyante.
Kalpasan ket immuli isuna idiay fifth floor ken pinaltogan iti bagbagi na. Nakita mismo dagiti nagresponde a pulis iti pasamak ken pinadas pay a pakalmaen iti suspek tapno ibaba iti imet na nga armas.
Agtultuloy met iti forensic examination iti cellphone ti estudyante. Tingtingitingen met ti kapulisan ti posible a pagsungbatan ti Ama na a makinkukua ti maysa kadagiti nausar a paltog.
