BR LA UNION – Siniguro ti Palasyo kenni Vice President Sara Duterte a saan nga aramaten ti administrasyon Marcos iti Philippine National Police wenno PNP tapno dangran isuna wenno dagiti supporters na.
Daytoy ti nagbalin a waragawag ti Presidential Communications Office kalpasan nga ibaga ni Duterte a maamak para iti biag na ken saan nga agtalek iti pulisya, korte ken iti mismo a security team na.
Segun kenni Palace Press Officer Claire Castro, saan nga itulok ti administrasyon a mausar ti PNP iti anyaman a klase ti kinadamsak.
Impaganetget ti opisina nga ar-aramiden laeng ti PNP iti mandato da maiyannurot iti linteg, nga awan ti pabpaboran wenno konsiderasyon pampulitika.
Impaganetget ti Palasyo ti talek na iti liderato ken iti nasurok 230,000 a kameng ti PNP nga agtultuloy ti propesyonal a panangprotektar iti karbengan dagiti tattao a mabanbantayan.
Inallokoy ti administrasyon ni Duterte nga idalan iti legal a wagas ti anyaman a reklamo wenno paagdanag iti tignay ti pulisya, imbes a mangiruar ti awan basaran nga alegasyon.
Nangipeksa met ti panniguro ni PNP Chief Gen. Jose Melencio Nartatez Jr. a respondian ti pulisya iti panagamak ni Duterte iti seguridad na.
Nabilin dagiti maseknan a police units nga agtultuloy nga i-monitor ken mangisayangkat ti threat assessment kontra iti bise presidente ken iti immediate family.
Ngem imbaga ti PNP nga agingga ita ket awan pay ti na-establisar da a beripikado a pangta kontra kenni Duterte wenno iti pamilya na.
Nangrugi ti panagdanag ni Duterte para iti seguridad na kasaruno ti pannaikairuar ti arrest warrant gaputi tallo a kaso ti grave threats nga inaramid na kontra kada President Ferdinand Marcos Jr., First Lady Liza Araneta-Marcos ken sigud a House Speaker Martin Romualdez.
