Sumagmamano a sendor iti nangipeksa ti pagayatan da nga ited lattan iti Korte Suprema iti desisyon seknan iti voting threshold tapno ma-convict ni Bise Presidente Sara Duterte iti impeachment trial.
Daitoy ket dinamag nga umuna ni Senator-Judge Erwin Tulfo, nu kasatno a maisayangkat iti 16-vote requirement nu adda met dagiti pada na a Senator-Judgees a saan a dumardar-ay iti panagusig.
Uppat a senador iti saan a regular nga umat-atendar iti impeachment: dagitoy ket isuda Senador Jinggoy Estrada ken Rodante Marcoleta nga agdama a nakabalud gapo iti plunder, Ronald “Bato” dela Rosa a taktakasan iti arrest warrant manipud International Criminal Court, ken Loren Legarda nga adda metlaeng sadiay ballasiw-taaw gapo iti parikut ti salun-at.
Kinuna ni Senador JV Ejercito a kaykayat na lattan a tamingen daitoy a saritaan ti Korte Suprema tapno saanen a maparigatan pay iti impeachment court. Nangipeksa met iti kapada a sentimiento ni Sendor Raffy Tulfo nu kasta ket agbalinen a pinal iti desisyon ken malawlawagan iti am-amin.
Awan pay iti agdama a posisyon ni Senate President Win Gatchalian ken ur-urayen na ti diskusyon kadwa dagiti Amici Curiae wenno eksperto nga inimbitaran ti impeachment court.
Nakatuding a mangngegan dagitoy inton Setyembre 16, sakbay iti oral arguments ti prosekusyon ken depensa inton Setyembre 23, nu katno a manamnama a pagbobotosan ti impeachment court ti nasao a ‘treshold.’
Kabayatanna, inlawlawag ni Senador Erwin Tulfo a saan na a panggep nga ibaba iti 16-vote threshold, nu ketdi, maaddaan iti nalawag nga interpretasyon nu siasino dagiti karaman ti “All members of the Senate” a dakdakamaten ti Konstitusyon.
