Pinagkedkedan iti Senate Impeachment Court iti mosyon ti depensa ni Bise Presidente Sara Duterte (VPSD) a saan a palubosan ti prosecution team nga ipasango iti testigo da para iti Article II, a mangdakdakamat iti saan a mailawlawag a kinabaknang ken saan a panangideklara ti umiso a Statement of Assets, Liabilities, and Net Worth wenno SALN.
Ita a ‘Day 24’ ti impeachment trial ket rinugian ti prosecution panel iti panangilatag kadagiti ebidensya ti Article II ken impasango kas testigo ni Retired Sandiganbayan Presiding Justice Amparo Cabotaje-Tang.
Tarigagay ni Tang nga ilawlawag dagiti prinsipyo seknan ti ‘undisclosed SALN,’ unexplained wealth, ken panangiparit ti kaadda iti business interest ti maysa nga opisyales iti gobierno.
Kinontra ni Attorney Mark Vinluan manipud defense team ti panagsango ni Cabotaje-Tang kas testigo gappuanan ta saan met a karaman isuna ti listaan idi pre-trial ken awan metlaeng ti reservation kenkuana kas surprise witness, nga impaganetget na ket mailabsing iti Senate impeachment rules.
Kinuna pay ni Vinluan a saan a nagbalin a Supreme Court justice ni Cabotaje-Tang nu ketdi maysa laeng a Sandiganbayan justice, ken adda dagiti pakasaritaan ti desisyon na a kumontra iti interpretasyon ti Korte Suprema.
Nupay kasta ket pinalubosan latta ni Senate Impeachment Court presiding officer Chiz Escudero iti prosekusyon nga ipasango ni Cabotaje-Tang kas testigo. Innayon na pay a saan a kasapulan nga ideklara ti korte nu eksperto wenno saan iti testigo.
