BR LA UNION – Pinatulodan ti subpoena ti Senate Impeachment Court ni Davao City Mayor Sebastian “Baste” Duterte ken dadduma pay nga indibiduwal tapno dumar-ay iti agtultuloy nga impeachment trial ni Vice President Sara Duterte inton Setyembre 23, 2026.
Adda pakainaiganna daytoy iti alegasyon nga addaan ti unexplained wealth ti kabsat na a ni VP Sara.
Maysa laeng ti nagan ni Mayor Baste kadagiti dinakamat ni Presiding Officer Francis “Chiz” Escudero ita nga aldaw ti Miyerkoles a mapatulodan ti subpoena ad testificandum et duces tecum tapno umatendar iti impeachment trial inton sumaruno a lawas.
Malaksid kenni Mayor Duterte, mapaayaban pay da Securities and Exchange Commission Company Registration and Monitoring Department Director Gerardo del Rosario, Civil Service Commission Assistant Commissioner Ariel Ronquillo, ken Rendell Sopeña ti Philippine Government Electronic Procurement System ti Department of Budget and Management.
Nupay kasta, segun kenni Escudero, mabalin nga agbaliw pay ti iskedyul iti panagdar-ay ni Duterte ken dadduma a testigo, depende iti agbalin a progreso ti panagusig tapno saan a maitantan iti opisyal a pagrebbengan dagitoy.
Kabayatanna, nakatuding pay inton Setyembre 23 ti panangdengngeg iti isyu ti voting threshold para iti conviction iti impeachment trial, ken manamnama a pagbobotosan dagiti senator-judge iti kapada nga aldaw.
