BR LA UNION – Kinumpirma dagiti opisyal idiay Tennessee a saan da a naipatungpal ti dusa a patay kenni Christina Gail Pike idi Miyerkules, Setyembre 30, kalpasan ti arigna saan a timmalab a namindua a daras a pannaka-inject na ti lethal drug.
Segun kadagiti abogado na, nakita da nga agang-anges, agur-urok, ken adda pay hearbeat na ti sentensiyado a ni Pike kalpasan a naipaayan ti dua a dose ti pentobarbital.
Gaputi dayta, nailugan iti ambulansya manipud pagbaludan ken maipapaayan ita ti “life-saving measures” iti maysa nga ospital, segun kadagiti Tennessee authorities.
Ngem saan pay a nalawag nu anya ti health status ita ni Pike.
Naituding ti sentensiya ni Pike alas-10 ti agsapa idi Miyerkules (oras idiay Estados Unidos), gaputi inaramid na a nakaam-ames a krimen wennno pammapatay idi agtawen pay laeng isuna ti disi-otso idi 1995.
Nu maipatungpal ti execution, isuna ti kaunaan a babai mapatawan ti bitay idiay Tennessee iti uneg ti nasurok 200 a tawen.
Maysa nga oras sakbay ti nakatuding nga execution, temporaryo a naipasardeng. Kalpasan ti sumagmamano pay nga oras, imbasura ti U.S. Supreme Court ti nasao a pammilin.
Segun kenni Robin M. Maher, executive director iti Death Penalty Information Center, ti kapadasan ni Pike ket ‘saan a gagangay ken awan kapada na.’
Ni Pike ket agtawen itan ti 50, nasentensiyaan ti dusa a patay idi 1996, gaputi brutal a pannakapapatay ti 19-anyos a ni Colleen Slemmer, a maipagarop a kakuntiyabo na ti sigud a boyfriend na a ni Tadaryl Shipp.
