BR LA UNION – Nainget a kinondinar ni Japanese Defense Minister Shinjiro Koizumi iti pannaka-arestar ti maysa a 20-anyos nga U.S. Marine kalpasan a mairaman iti kaso a murder ken robbery iti biktima a 39-anyos a babai iti maysa nga hotel idiay Naha, Okinawa, Japan.
Kabayatan ti naisayangkat nga official briefing, inladawan ni Koizumi ti insidente kas “absolutely unacceptable”.
Kasaruno ti insidente, nangaramid ti gobyerno ti Japan iti natibker a protesta iti U.S. embassy ken iti military command, babaen iti panangallokoy kadagitoy a kitaen iti kababalin ti tropa tapno saanen a maulit ti kapada nga insidente iti masangwanan.
Agtultuloy ti imbestigasyon ti Okinawa police tapno duktalen ti pudno a motibo ti insidente.
Kabayatanna, pinaglibakan ti suspek ti maiyak-akusar kenkuana.
Nangirwar metten ti statement iti U.S. embassy ken Marine Corps, a nakasagana dagitoy a makitinnulong iti pulisiya ken judicial investigations idiay Japan.
