BR LA UNION – Marikna dagiti aglaklako iti prutas iti merkado idiay ili ti San Juan, La Union iti epekto ti nakaru a pudot ken agtultuloy a panagngato ti presyo dagiti produkto a petrolyo, gaputa nakapsot ita ti panaglakwan.
Segun kenni Apolonia Villareal, maysa a fruit vendor iti nasao a merkado, kapilitan nga ingato da met ti presyo dagiti tagilakoda gaputa ngimmato met ti gastos iti pannakai-biyahe wenno delivery dagiti produkto.
Segun kenkuana aggap-gapu pay idiay Urdaneta, Pangasinan dagiti tagilakoda, isunga apektado ti gastos da iti transportasyon.
Malaksid iti dayta, kanayunan pay a parikut dagiti aglaklako ti napartak a pannakadadael ti sumagmamano a prutas gapu iti nakaro a kinapudot ti panawen.
Kinuna ni Villareal a nu saan a mailako a dagus, kapilitan nga iyawidda dagiti nabati a produkto tapno saan a masayang ken saan a malungtot, ngem mabalin latta a pakaigapuan daytoy ti pannakalugi.
Iti agdama, karaman ti lansones ken rambutan kadagiti prutas a masansan a gat-gatangen dagiti konsumer gaputa kaadu ita ti supply dagitoy a prutas ken mas kabaelan ti presyo na ita, kumpara iti dadduma a klase ti prutas.
Ti lansones ket aggatad iti ₱130 iti kada kilo, rambutan ket ₱70 kada kilo, bayat a ti ubas ket dumanon iti ₱230 kada kilo.
Mangnamnama dagiti aglaklako a sumayaat ti taray ti panaglako da inton bulan Disyembre.
