BR LA UNION – Nakasentro iti kinapateg ti estadistika para iti panagdur-as ti turismo ken sustainable development iti selebrasyon ti maika-37 a National Statistics Month ita a bulan ti Oktubre.
Babaen ti tema ita a tawen a “Tuklas Pilipinas: Statistics as Beacon Towards Inclusive, Resilient, and Sustainable Tourism.” addaan daytoy ti gagem a mapalawa ti pannakaammo ken pannakaawat dagiti umili iti kinapateg ti estadistika, saan laeng a ditoy La Union ngem ketdi iti intero a pagilian.
Maiyannurot iti Presidential Proclamation No. 647, ipakpakita na iti kinapateg ti datos ken estadistika iti inaldaw a panagbiag, panagplano, ken pannakaisagana dagiti programa ken proyekto ti gobyerno.
Segun kenni Laarnie C. Obligacion, Statistician III iti Philippine Statistics Authority (PSA) – La Union Provincial Statistical Office, nakalinya iti nadumaduma a aktibidad a maisayangkat iti intero a bulan kas panagrambak iti National Statistics Month.
Pormal a naluktan ti selebrasyon babaen ti motorcade ditoy siyudad ti San Fernando City idi Oktubre uno ken nakadwa ti PSA-La Union dagiti lokal a gobyerno ken opisina ti civil registry.
Iti uneg ti Speaker Pro Tempore Francisco I. Ortega Convention Center, makita ti naiset-up a statistical exhibit, a pagalaan dagiti bisita iti flyers ken dadduma pay nga impormasyon maipapan iti estadistika.
Nakatuding nga agleppas ti selebrasyon iti maudi a paset ti Oktubre 2026.
