BR LA UNION – Kinuwestiyon ni Senator-judge Robin Padilla nu apay nga agtultuloy a madak-dakamat iti impeachment trial ti nagan ni sigud a presidente Rodrigo Duterte seknan dagiti bank records a mailan-lanad idiay Senado.
Iti panagsalodsod kenni BPI witness Marwin Galvez, imbaga ni Padilla a namin-adun a daras a nadakamat iti panagdengngeg iti nagan ti sigud a presidente, gaputi maipagarop a joint account da kenni Vice President Sara Duterte.
Immuna a kinumpirma ni Galvez nga addda ti joint bank account da Vice President Sara Duterte ken sigud a Presidente Duterte.
Maibasar iti testimonya, adda ti dua a time deposit iti sidong ti nasao a joint account a maipagarop nga umabot iti pakabuklan a P96 milyon, maysa a P41-milyon a time deposit idi 2010 ken maysa pay a P55 milyon nga idi agangay ket na-convert iti manager’s check.
Tarigagay ni Padilla a madetermina nu adda ti anyaman a dokumento a mangipaneknek ti iregularidad wenno “kalokwan” nga inaramid ti sigud a presidente seknan kadagiti transaksyon a makita iti nasao a records ti bangko.
