Binigbig ni Interior Secretary Jonvic Remulla ni Edriezan Hadji Nasser Rimbang, sigud a kameng ti Bangsamoro Parliament, kas ti maipagarup a financier ti gandat a panangipuslit iti 521 kilos ti mapapati a shabu nga aggatad iti ₱3.5 billion manipud Laos nga agturong iti Pilipinas.
Iti Palace briefing idi kalman Biernes, Oktubre 16, indatag ni Remulla ti diagram a mangisilsilpo kadagiti indibidual a maipagarup a nairaman iti operasion. Segun iti sekretario, naabak ni Rimbang idi napalabas nga eleksion.
Innayona pay,nga ti asawa ni Rimbang a ni Princess Rohaniah Rimbang, ket kabsat ti asawa ti lalaki nga agus-usar iti alias a “Fahad.” a naarestar iti maysa nga airport sadiay Laos.
Mapapati a binayadan ni Rimbang ni Police Master Sergeant Aileen Jane Manalo Mendoza a mangasikaso iti landing rights ken pannakaaramat ti pribado nga hangar a mapapati a pagdissuan ti eroplano nga aggapu idiay Laos idi maudi a lawas ti Setiembre.
Kabayatanna, ni Kapitan Rioklyn Toledo, nga agus-usar iti alias a “Boyet,” ket mapapati a naglugan iti pribado nga eroplano manipud Malaysia nga agturong idiay Laos.
Kinuna ni Remulla a lisensiado daytoy a piloto ken sigud nga agtartrabaho iti maysa a kangrunaan nga airline. Nupay kasta, kuna ti sekretario a naikkat iti trabaho ni Toledo gapu iti reputasionna a mainaig iti panaglako iti illegal a droga.
Innayon pay ni Remulla a nakikoordinar ni Toledo kenni Mendoza tapno masigurado ti pannakausar ti MAPTRA hangar a nakaituding a pangipatulodan kadagiti kargamento.
Inwaragawag ni Remulla a karaman ni Rimbang ti partido ni sigud a Presidente Rodrigo Duterte. Nupay kasta, inlawlawagna nga awan ti espesipiko nga etniko a grupo, siudad, wenno komunidad ti mairamraman iti kaso. Kinunana nga idatdatag laeng dagiti otoridad dagiti persons of interest maibasar kadagiti nakalap nga impormasyon kabayatan ti imbestigasyon.
Inlawlawag pay ni Remulla a kayatda a supiaten ti panangmatmat, a dagiti taga-Manila ti addaan iti likod ti gandat a panangipuslit ken impaganetget a nakapamaysa ti imbestigasion kenni Rimbang ken kadagiti mapapati a kakuntsaba-na.
Idi mapagsaludsodan no posible nga adda pay sabali a politiko manipud Mindanao a karaman, kinuna ni Remulla a saanda nga ilaksid daytoy a posibilidad. Nupay kasta, ni laeng Rimbang ti naikonektar iti kaso agingga ita.
Kasaruno iti daytoy, inallukoy ti sekretario iti Kongreso a mangipasa iti linteg a mangklasipika kadagiti organisasion a karaman iti narco-trafficking kas terorista nga organisasion.
Segun kenni Remulla, makatulong daytoy tapno mapalaka ti panagtitinnulong dagiti pannakabagi ti linteg iti nadumaduma a pagilian iti pannakidangadang kadagiti grupo a karamann iti illegal a droga.
Kabaytanna pinasingkedan met ni Philippine National Police Chief Police General Jose Melencio Nartatez Jr. a naikkaten ni Mendoza iti puestona ken agdama nga adda iti restrictive custody ti Aviation Security Group.
Segun kenni Nartatez, mapapati nga adda ni Rimbang ditoy Pilipinas, Nabigbig metten dagiti autoridad ti saan a bumaba iti 13 a tattao ti karaman iti plano.
