Posible a mangiruar ti resolusyon iti Senado mainaig ti karit ti Chinese Embassy kadagiti agpanpanday-linteg nga ideklara a persona non grata ni Chinese Ambassador to the Philippines Jing Quan gapu kadagiti waragawag na kontra iti Pilipinas.
Segun kenni Sen. Joseph Victor “JV” Ejercito idi Dominggo, pagsasaritaanen dagiti senador iti posibilidad a mangiruar ti resolusyon kasaruno ti nagbalin a waragawag ti embahador a maipagarop a nalaka nga abaken ti China iti Pilipinas nu mangusar daitoy ti puwersa mainaig iti saritaan iti West Philippine Sea.
Inladawan ni Ejercito kas “very rude, hostile, and undiplomatic” dagiti waragawag ni Jing, a nangkuna a mas pilpilien ti China iti kinakapia laksid a mangusar ti puwersa.
Para iti senador, nasaysayaat a sukatanen ti Beijing iti embahador nu seryoso daitoy a pasayaaten iti relasyon ti dua a pagilian.
Kinuna na, saan a makatulong dagiti kapada a waragawag ken aglalo pay daitoy a mangpakaro ti tensiyon.
Kabayatanna, kinarit met ti Chinese Embassy dagiti agpanpanday linteg nga itandudo iti nasao nga addang.
