Papigsaen ti Department of Education (DepEd) ken Department of the Interior and Local Government (DILG) iti seguridad kadagiti pagadalan babaean ti panag-deploy iti barangay tanod ken panang-palawa ti national 911 emergency system kadagiti eskuwelaan.
Sakopen daytoy ti joint memorandum circular a pinirmaan ti dua nga ahensya idi Oktubre 14, iti panangidaulo da Education Secretary Sonny Angara ken Interior Secretary Jonvic Remulla, kagiddan ti panangisayangkat ti school safety audit ken emergency drill idiay Bangkal High School idiay Makati City.
Iti sidong ti katulagan, mabalin ti maki-koordinar dagiti pagadalan kadagiti barangay tapno kumiddaw ti tulong kadagiti tanod iti panangmantinir ti kinaurnos ken kinatalged iti uneg ken aglawlaw dagiti pagadalan.
Nupay kasta, inlawlawag ti departamento a saan a sukatan dagiti barangay tanod dagiti otoridad ti pagadalan.
Maipaisidong nga umuna dagitoy iti oryentasyon tapno masiguro a masur-surot iti allagaden iti pannaka-aywan dagiti ubbing, karbengan dagiti agad-adal ken kinatalged iti pagadalan.
Malaksid iti panagnayon ti kabinnulig da iti panangipatungpal ti seguridad, iraman metten ti DepEd iti unified 911 emergency system ti Department of the Interior and Local Government iti tulong ti technology firm nga NGA Philippines.
Iti sidong ti nasao a sistemang, aggiddan a maawat ti Philippine National Police (PNP) ken Department of Education iti report seknan ti emergency tapno napartak iti panangsungbat ken koordinasyon ti dua nga ahensya.
Dumalan pay iti validation iti opisina ti Department of Education iti central, regional ken schools division levels dagiti insidente.
Segun iti NGA Philippines, nairanta daytoy a pabiiten iti prosesong a sigud ket umab-abot ti sumagmamano a lawas tapno maileppas iti uneg laeng ti maysa nga aldaw, bayat a sentralisado iti panagidulin ti impormasyon.
Inyuswat ti DILG iti unified emergency hotline idi Setyembre 2025 tapno pagtiponen iti maymaysa a serbisyo iti nasurok 30 a lokal nga emergency hotline.
Nairanta ti addang a papigsaen dagiti mekanismo iti panangsungbat dagiti insidente ti kinadamak, pammaltog, ken dadduma pay a pangta iti kinatalged dagiti agad-adal ken kameng iti pagadalan.
