Napandagan ken natay iti Parish Priest a ni Father Patricio Alfredo Sánchez Molinari kasaruno a deretso a napandagan iti ulo na iti natnag a Krus kabayatan iti panangidaulo iti misa idiay Guayaquil, Ecuador.
Naka-livestream pay iti misa na idi Oktubre 17 idiay Our Lady of Perpetual Help Church, nu sadinno ket paset isuna iti Congregation of the Most Holy Redeemer.
Pagaammo a karamrambak laeng ni Father Molinari iti kina-Padi na, maysa aldaw laeng sakbay iti insidente. Malaglagip met isuna para iti naimpusoan a kontribusyon iti uneg ti simbaan, panangisakit kadagiti awanan, ken ti panagserbi kas espiritual a giya kadagiti adu a pamilya.
Nakiladingiten iti Archdiocese of Guayaquil kadagiti nabati ni Father Molinari kasta met dagiti kakadwa na iti simbaan.
Kabayatanna, naikedked met a mai-publiko ti makagapo iti pannakatnag ti dakkel a Krus a rason iti pannakatay na ken nupay daksang-gasat iti nagbanagan iti misa, malaglagip met dagiti tattao idiay Guayaquil ti legasiya nga imbati ni Father Molinari kadagiti naserbianna iti sibibiag pay.
