Agdagup iti 599 nga estudyante ti nabakunaan babaen ti programa ti Gobierno Siudad ti San Fernando a “Bakuna Eskwela” (Vaccination in Schools)— maysa nga inisyatiba a nairanta a mangsalaknib kadagiti ubbing manipud kadagiti sakit a mabalin a mangapektar ti salun-at ken edukasyonda.
Dagiti bakuna a maipapaay ket iti measles-rubella (MR), tetanus-diphtheria (Td), ken human papillomavirus (HPV).
Babaen ti programa, manipud iti Grade 1 ken Grade 7 ket umawat iti measles-rubella ken tetanus-diphtheria vaccines, idinto a ti HPV vaccine ket naituding para kadagiti estudyante iti Grade 4 ken 5 nga agtawen ti 9 ken 14.
Nangrugi ti vaccination drive idi Oktubre 19 idiay Dallangayan Elementary School, ken naigiddan a naipatungpal kadagiti dadduma a pagadalan, pakairamanan iti La Union National High School, Canaoay Elementary School, ken Bangbangolan Elementary School.
Agtultuloy ti programa a “Bakuna Eskwela” iti nadumaduma a pagadalan ditoy siudad manipud Oktubre 26 agingga 30.
Dagiti sumaruno nga eskuwelaan a pakaipatungpalan ti programa ket iti Dalumpinas Integrated School, Catbangen Central School, Dr. Quintin Balcita National High School, San Fernando City National Vocational High School, ken dadduma pay nga eskuelaan iti intero a siudad.
Segun iti impormasyon nga inruar ti lokal a gobyerno, nainget ti pannaka-amiris dagiti bakuna tapno masigurado a natalged ken epektibo dagitoy.
Kabayatanna, maallokoy dagiti nagannak a makiuman kadagiti propesional iti salun-at no adda iti saludsod wenno pakaseknanda sakbay a mapabakunaan dagiti annakda.
