Bimmisita ditoy Pilipinas iti professional pickleball star ken world no. 2 ace a ni Anna Bright kas paset ti dua-aldaw a panagbisita na idiay Manila, manipud Oktubre 26 ken 27.
Nabara a sinabat dagiti fans ken local pickleball enthusiasts ni Bright idiay SM Mall of Asia Music Hall ken nakaay-ayam na iti sumagmamano kadagitoy.
Imbinglay ti world no. 2 iti potensyal ti tay-ak ti pickleball ditoy pagilian gapu iti kunana nga umad-adu a bilang dagiti pickleball courts ken iti panagayat dagiti agbuy-buya – dagita ket senyales kunana iti pannaka-hilig iti nasao nga ay-ayam, saan laeng a ditoy pagilian ngem ketdi iti intero nga Asya.
Adda pakainaigan iti panagbisita ni Bright iti panagsagana ti pagilian kas host country iti kaunaan a PPA Asia Tour events a maisayangkat iti sumaruno a tawen, nakatuding inton Enero 14 agingga 18, 2027 para iti PPA 125 ken mapasarunwan ti PPA 500 Manila Open inton Pebrero 25-28, 2027 idiay Pasig City.
Kinuna met ni sports executive ken sigud a chairman ti Philippine Sports Commission a ni Dickie Backmann, napintas a gundaway iti panangisayangkat ti international pickleball tournaments ditoy pagilian tapno lalo a maiyasideg kadagiti local players, a sigud ket kasapolan pay nga agturong da iti sabali a pagilian para iti kompetisyon.
