Inyuswat ti Philippine National Police (PNP) iti hotlines a makatulong tapno napartak iti panangsapol kenni Senator Ronald Dela Rosa.
Segun kenni PNP Public Information Office chief Col. Allen Rae Co, a babaen ti nasao a hotlines ket maidanon ti publiko dagiti impormasyon nga ammo da para iti panangarestar iti pugante a Senador.
Agtultuloy iti ar-aramiden da a panangsapol iti Senador ngem nasay-sayaat kunana nu boluntaryo daytoy a sumuko tapno maliklikan iti anyaman a nadara nga engkuwentro.
Binallaagan na met dagiti prank callers a kaswan da dagitoy nu mangloko da ti tawag.
Siniguro ni Co, nga addaan da ti naan-anay a bilang wenno puwersa a mangsapol iti Senador.
Naudi a nakita iti publiko iti Senador idi bulan ti Mayo idi immatendar iti sesyon idiay Senado, ngem kalpasanna, naglibas met laeng daytoy babaen ti tulong ti nasinged kenkuana a senador.
Inton bulan ti Nobyembre ket maysa tawenen iti warrant of arrest nga inruar ti International Criminal Court kontra iti Senador kalpasan a mairaman iti kaso a crime against humanity gaputi nadara a kampanya kontra droga ni sigud a presidente Rodrigo Duterte, ken hepe idi ti Philippine National Police iti Senador.
Kabayatanna, agleppas met ita nga aldaw iti makalawas nga ultimatum nga impaay ti Philippine National Police (PNP) ken Department of the Interior and Local Government (DILG) kenni Senator Ronald “Bato” dela Rosa idi Oktubre 23, 2026.
Immunan nga imbaga ni Secretary Jonvic Remulla a ‘No Mercy’ nu saan a sumuko ti senador ita nga aldaw, kaipapanan nga ipatungpal dagiti otoridad ti operasyon tapno arestaren ti senador, nga adda patong iti ulo na a ₱50 milyon pisos.
