Naisayangkat ti Newborn Screening Awareness Celebration nga addaan tema a “Reunion of Saved Babies” idiay Speaker Pro Tempore Francisco I. Ortega Convention Center, Barangay Sevilla, Siudad ti San Fernando, La Union idi kalman, Oktubre 28.
Segun kenni Provincial Health Officer II Dr. Herminigildo M. Velasco, ti nasao nga aktibidad ket marambakan tunggal Oktubre tapno mapalawa ti pannakaammo ti publiko maipapan iti kinapateg ti newborn screening, para iti nasapa a pannakaduktal dagiti posible a sakit kadagiti kappasngay a maladaga.
Segun ken ni Velasco, maiyanjurot iti Republic Act No. 9288 wenno Newborn Screening Act of 2004, dagiti kappasngay a maladaga ket masapul a maipasidong iti newborn screening iti uneg ti 24 nga oras kalpasan ti pannakayanakda.
Inlawlawagna nga adda dagiti genetic disorders a saan a dagus a mangipakita iti sintomas kadagiti kappasngay a maladaga. Nupay kasta, no saan a mailasin ken maagasan a dagus, mabalin nga agtungpal iti nakaro a komplikasyon, agraman dagiti parikut iti nutrisyon, problema iti panagdakkel, ken uray pay ipapatay.
Impaganetgetna pay a dakkel ti maitulong ti programa ti Department of Health (DOH), kabinnulig Provincial Government of La Union, iti panang-determina dagiti sakit a mabalin a saan a dagus a madlaw kadagiti kappasngay a maladaga ngem mabalin a maagasan no nasapa a maduktalan.
Maibasar iti datos a naibinglay kabayatan ti nadakamat nga aktibidad, umabot iti 570 a kaso dagiti maladaga ditoy La Union nga addaan ti genetic diseases a mabalin a maagasan babaen ti newborn screening program.
Impaganetgetna a babaen ti agtultuloy a pannakaipatungpal ti newborn screening ket nasaysayaat ti pannakasalaknib ti salun-at dagiti maladaga ken maikkanda iti nasaysayaat a gundaway tapno maaddaanda iti nasayaat a masakbayan ken agbalinda a produktibo nga umili ti La Union.
