Kinarit ni Davao City 1st District Representative Paolo “Pulong” Duterte iti administrasyon nga iruar iti publiko iti maipagarop nga warrant of arrest kontra kenni Senador Ronald “Bato” dela Rosa ken ilawlawag iti legal a basaran ti proseso.
Kinuwestiyon ni Duterte iti maipagarop a panaglabsing ti due process ken inyarig daitoy iti pannakaipatulod kenni sigud a Presidente Rodrigo Duterte idiay The Hague, Netherlands.
Kinuna ti kongresista a rumbeng a masurot iti Konstitusyon ken Rule of Law iti amin a gundaway, aniaman iti personalidad a karaman ti kaso.
“Rule of law, not rule by force. Show the warrant,” imbaga ni Duterte.
Inallukoy na met dagiti pulis a saan nga agpausar iti aniaman nga operasyon a mabalin nga aglabsing iti karbengan dagiti umili.
