Dua kadagiti namnamaen a testigo ti depensa ni Vice President Sara Duterte iti saan a makadar-ay iti panaglukat ti presentasyon dagiti ebidensya da iti impeachment trial inton Lunes, Nobyembre 9.
Segun kenni House lead prosecutor ken Batangas 2nd District Rep. Gerville “Jinky Bitrics” Luistro, nagkedked a tumestigo ni constitutional law professor Ralph Sarmiento tapnu mapagtalinaed iti kinawaya na ken awan ti kilkilingan kas legal scholar.
Saan met a makipaset ni Atty. Suzette Balucanag-Punay, corporate counsel ti GenCorp Industries Inc. ken Metro City Chow Foods Corp., gapu iti nakaituding na nga MRI.
Manamnama nga ibatad da dagiti dokumento mainaig kadagiti korporasyon ken negosyo a maikonkonektar kenni Duterte.
Kinuna ni Luistro, namnamaen da a sumakat kas umuna a testigo ti defense team isuda Davao City Assessor Jaime Adalin, Island Garden City of Samal Assessor John Kenneth Enumerables, ken Matina Crossing Barangay Chairperson Cindy Colina.
Manamnama pay a mailawlawag dagiti opisyal kadagiti tax declaration ken mapa dagiti sanikua a kuweskuwestiyonen ti prosecution gapu iti maipagarop a saan a panagpapada daitoy iti Statements of Assets, Liabilities and Net Worth (SALN) ni Duterte.
Immunan nga impasango ti House prosecution dagiti titulo ken deed of sale ti dua a sanikua a maipagarop a saan nga agpada kadagiti deklarasyon iti SALN ti Bise Presidente.
Nakaituding met a sukimaten ti prosecution iti panangilawlawag dagiti testigo ti depensa.
