Mangrugin a maipasdek iti Ligtas Pinoy Center idiay Barangay Suyo, Bagulin, La Union a maibilang a kaunaan a pasilidad iti intero nga Ilocos Region.
Daytoy ket kalpasan ti ballaygi ken napnuan kaipapanan a groundbreaking ceremony ita nga aldaw ti Martes, Nobyembre 10, 2026.
Paset daytoy iti panang-papigsa iti kinasagana dagiti Elyukanos ditoy La Union iti panagresponde ken panangsango dagiti kalamidad.
Iti seremonya ket indaulwan ni Civil Defense Administrator Undersecretary Harold N. Cabreros idiay Barangay Suyo, kadwana da Bagulin Mayor Virgilio Flor, Office of Civil Defense (OCD) Region 1 Acting Regional Director ken Deputy Administrator for Operations Assistant Secretary Laurence Mina, Department of Public Works and Highways (DPWH) Ilocos Regional Director Engr. Robert Jay Panaligan, ken iti suporta ni Gov. Mario Eduardo C. Ortega.
Naisayangkat pay ti pannakapirma iti Memorandum of Agreement para iti pormal a pannakaipasdek ti pasilidad.
Agbalor ti nasao a proyekto ti P71,649,756.33 a naponduan iit sidong ti General Appropriations Act (GAA).
Kabilang iti Bagulin iti Rank 1 Priority LGUs nga addaan ti nangato a risgo iti kalamidad, maibasar iti LPC Prioritization Scorecard.
Mangrugi ti konstruksyon ita a bulan ken manamnama a maiturpos iti sumaruno a tawen.
Ti nasao a pasilidad ket maysa a permanente, moderno, ken disaster-resilient nga evacuation center, tapno agbalin a natalged ken naurnos a pagdagusan dagiti residente a kasapolan nga umakar iti panawen ti kalamidad ken dadduma pay nga emerhensiya.
Tampok iti nasao a pasilidad iti healthcare station, naurnos a pagturogan, nadalus a comfort room, ken adda pay maituding a lugar para kadagiti taraken nga ayup.
Maipalagip a pinirmaan ti Office of Civil Defense, Department of Public Works and Highways , Department of Interior and Local Government ken iti lokal a gobyerno ti Bagulin ken Bangar iti Memorandum of Agreement idi Hunyo 30, 2026 kabayatan ti naisayangkat a Second Quarter Regional Disaster Risk Reduction and Management Council Full Council Meeting.
