Dinayaw iti Philippine Legislators’ Committee on Population and Development (PLCPD) iti House Committee on Health para iti panangaprobar idi Nobyembre 11 iti Smoke-Free and Vape-Free Environment Bill, a nairanta tapno salakniban iti publiko kontra peggad iti asok iti sigarilyo ken vape.

Naiwaragawag daitoy kagiddan iti panagrambak iti National Children’s Month.

Pinagyamanan met ni PLCPD Executive Director Au Quilala ni House Committee on Health Chairperson ken Manila 4th District Representative Giselle Mary L. Maceda iti panangipaay-prayoridad iti singasing.

Ti House Bill 9603, nga insurat ni Albay 1st District Representative Krisel Lagman, ket naglaon iti RELATE framework a naibasar kadagiti balligi dagiti ordinansa kontra panagsigarilyo ken panangaramat iti vape idiay Baguio, Iloilo, ken Davao.

Karaman kadagiti probisyon na iti panangikkat iti indoor smoking ken vaping areas, panangpalawa kadagiti smoke-free zone, panangitukon iti lokal a pondo para iti salun-at, panangbigbig kadagiti lokal a gobierno (LGU) a mangipatpatungpal iti programa, panangbukel iti task force, ken panangipaulog iti nadagdagsen a pannusa kadagiti aglabsing.

Impaganetget iti komite a maibasar iti 2024 Global Youth Tobacco Survey, innem ti tunggal sangapulo nga agtutubo a Pilipino nga agtawen iti 13-15 iti makalanglang-ap iti sigarilyo kadagiti pampubliko a lugar.