Plano a mangipila ti nadagdagsen a kaso ti Philippine Animal Welfare Society (PAWS) ken sumagmamano a pet owners kontra iti Ajhay Pet Crematorium gapu iti maipagarup a saan a pannakaipatungpal ti naikari a serbisio.
Segun kenni PAWS Executive Director a ni Atty. Anna Cabrera, ad-adalen da ti panangipila ti kaso nga syndicated estafa kontra iti pet crematorium ken dadduma pay nga indibidual a posible a karaman, malaksid pay iti immun-una nga estafa complaint nga inpila ti National Bureau of Investigation (NBI) iti Department of Justice (DOJ).
Agtultuloy ti panagurnong ti grupoda iti kanayonan nga ebidensia tapno makompleto ti 25 a bilang dagiti karaman, a maitunos iti orihinal a bilang dagiti bangkay ti ayup a nasarakan idiay Bulacan.
Inlawlawag ni Cabrera a nadagdagsen ti syndicated estafa gapu ta awan iti pyansa iti daytoy no mapaneknekan dagiti kasapulan nga elementona, karaman ti pannakairaman ti saan a kumurang a lima nga indibidual a mapapati a nangaramid iti panagkusit.
Inpakaammo pay ti abogado a mabalin a manayunan pay dagiti indibidual a sumango iti kaso, malaksid iti akinkukua iti pet crematorium.
Nairaman ti nasao a Pet Crematorium iti kontrobersiya kalpasan a nasarakan idiay Bulacan dagiti naibelleng a bangkay dagiti ayup, idinto a ti linaon ti sumagmamano nga urns ket masuspetsaan a saan a dapo dagiti taraken dagiti kliyente.







