Mapattapatta a 2,800 a soldado manipud iti 11 a pagilian ti Europa ti nakipaset iti dakkel nga ehersisio militar idiay abagatan a daya a paset ti Poland kas panagsagana iti posible a pannakaipatulod ti multinasional a puersa idiay Ukraine apaman nga agpatingga ti gubatna iti Russia.
Indauluan ti France ken United Kingdom ti dua a lawas nga ehersisio iti sidong ti Multinational Force Ukraine, a paset ti Coalition of the Willing wenno maysa a grupo dagiti pagilian a mangikarkari ti suporta ti seguridad ti Ukraine.
Karaman kadagiti pagilian a nakipaset ket ti Belgium, Estonia, France, Germany, Lithuania, Netherlands, Poland, Spain, Sweden, Turkey ken United Kingdom.
Naisayangkat iti panagsanay ti panaggaraw ken pannakaibiahe dagiti suldado ken alikamen ti militar, joint command operations, surveillance nga usar dagiti drones, depensa kontra iti drone attacks, ken panagsanay iti air ken maritime operations.
Apaman a maaddaan ti ceasefire, nakaituding a tumulong ti nasao a puersa a mangpapigsa ken mangbangon manen kadagiti armado a puersa ti Ukraine, mangipaay iti seguridad tapno malukatan manen ti airspace, ken pananglinis kadagiti minas iti Black Sea.
Nupay kasta, inlawlawag dagiti opisyal a saan a karaman iti mandato ti puersa ti pannakaisayangkat ti peacekeeping wenno peace-monitoring operations.
Kabayatanna, nagballaag metten iti Russia nga ibilangna ti aniaman a ganggannaet a soldado a maibaon iti teritorio ti Ukraine kas lehitimo a puntiria.





