LA UNION – Perwisyo ita para kadagiti residente ti Barangay Bagbag, Bauang, La Union iti abandonado a flood control project iti lugar da.
Arig na inaldaw iti panangikabil dagiti apektado a residente kadagiti sandbags tapno laeng saan a mairaman ti babbalay da iti pannakareggay ti daga nga inggubuay ti saan a nalpas ken naabandona a proyekto. Kinuna dagitoy a saan a naituloy ti konstrukyon ti flood control project gapo iti kinakurang ti pondo.
Kabayatanna, saan met a masinunuo iti Kapitana ti Barangay a ni Luz Sabado nu siasino iti nangirugi iti proyekto agsipud ta awan met iti aniaman a naipadanon kenkuada nga adda iti dike a maipasdek. Impadanon da daitoyen iti Municipal Risk Reduction Office ngem agingga ita ket “reported” laeng ti estado ti reklamo da.
Malidayan man kadagiti ka-barangayan na, awan met iti maaramidan ti Kapitana agsipud ta kinuna ti Department of Public Works and Highways Region 1 a saan da metlaeng a kukua ti nasao a flood control project, kasaruno iti panangidiaya iti alokasyon ti pondo tapno matuloy laeng iti konstruksyon.
Kumidkiddaw ita ni Kapitana Luz Sabado kadagiti maseknan nga otoridad para iti madagdagos a pannakaresolbar ti isyu nangruna ta saan met a ma-kontrol iti agraraira a “climate change” a manamnama nga agingga bulan ti Disyembre ket adu pay dagiti agduprak a babagyo. Maseknan pay isuna para iti kinatalged dagiti residente ti barangay nga agpegpeggad a maiyanod dagiti babbalay da.
Maibasar ti maysa a source, daitoy a flood control project ket mapatta-patta nga agatiddog iti sangaribo a metro a dumanon kuma agingga iti baybay ngem aganay dua gasot laeng a metro iti nalpas sakbay a naabandona.
