BR LA UNION – Agtalek ni Manila 6th district Representative Bienvenido Abante Jr. a makagun-od ti “more than enough” wenno nasursurok ngem one-third a kasapolan a botos manipud kadagiti miyembro ti House of Representatives tapno ma-impeach ni Vice President Sara Duterte.
Daytoy ket nu pagibasaran iti nagbalin a resulta ti binnotosan idi immuna nga impeachment ti Bise Presidente.
Iti maysa a presscon idi kalman, Sabado, Pebrero 21, inlawlawag ni Abante a manipud iti 311 a kongresista, 105 a pabor a botos laeng iti kasapolan wenno kaibatugan daytoy ti one-third tapno maipasa iti impeachment complaint idiay Senado.
Ngem saan a mailibak ti mammanday linteg nga adda panagamak na a posible a marigatan a makagun-od ti naan-anay a botos nu maipasa iti articles of impeachment kontra iti Bise Presidente idiay Senado.
Segun kenni Abante, kasapolan ti 16 nga affirmative votes dagiti senador tapno ma-convict iti Bise Presidente.
Mangnamnama ni Abante a saan daytoy nga agbalin a “political ploy”, imbes ket pagibasaran dagiti senador dagiti ebidensiya ken substansiya ti reklamo nga impeachment.
Kabayatannaa, impaganetget ni Abante nga agtungpal ti House of Representatives iti nagbalin a ruling ti Korte Suprema iti panangiggem iti impeachment complaints kontra kenni Vice President Sara Duterte.
Kinuna na a maibasar iti House Committee on Justice, adda pay ti 10 session days, tapno maikabil iti Order of Business kalpasan a ma-endorso wenno matransmit iti opisina ti House Speaker iti impeachment complaints.
Segun kenni Rep. Abante, posible nga umabot ti dua agingga tallo nga aldaw iti deliberasyon ti House Committee on Justice iti impeachment complaints kontra iti Bise Presidente sakbay a naan-anay a maisagpat idiay plenaryo ken kasapolan ti one-third a botos manipud kadagiti House members tapno ma-impeach ti maikadwa a kangatuan nga opisyal ti pagilian.
Maipalagip a maysa ni Abante kadagiti nag-endorso ti maikapat a reklamo nga impeachment kontra iti Bise Presidente, a kinumpirma ni House Secretary General Cheloy Garafil idi Huwebes, Pebrero 19 a naawaten iti opisina ni House Speaker Bojie Dy.
