Pinaglibakan ti abogado ti pamilya ti kidnap victim ken napapatay a negosyante nga Chinese a ni Anson Tan alias Anson Que nga adda pakainaigan ti kliyente na iti Philippine Offshore Gaming Operators wenno POGO.
Dayta ti inwaragawag ti tumaktakder kas counsel ti pamilya Tan a ni sigud nga Quezon City congressman Attorney Christopher “Kit” Belmonte.
Segun kenni Atty. Belmonte, pinaglibakan ti pamilya ni Anson Que dagiti alegasyon a karaman isuna kadagiti transaksiyon ti POGO; awan pay kunana ti renrentaan da a property idiay Bulacan.
Impaganetget na a lehitimo a negosyo laeng ti adda kenni Anson ti las-ud ti mano a dekada ken miembro pay isuna iti Filipino Chinese business community.
Ti pakabuklan a panagbiag ni Anson Que, liniklikan na dagiti mapagduaduaan a business deals ket dagiti laeng mapaktalkan na ti pangisaysayangkatan na kadagiti negosasyon.
Immapela met ti pamilya Tan iti publiko nga agtalinaed a vigilante kadagiti manangallilaw a damag kasta met a nagyaman da kadagiti maaw-awat a suporta.
Innayon na pay nga itultuloy ti pamilya Tan ti pannakikoordinar iti Philippine National Police kasaruno iti panagkiddaw da iti privacy ita a panawen nga agladladingit da paylaeng iti pammapatay kenni Anson.
Ti kumpirmasyon ti pamilya Tan ket kasaruno dagiti agwarwaras a damag a napapatay ni Anson Que babaen ti maysa a kidnap-for-ransom group nga konektado kadagiti POGOs.
