Saanen a nakaskasdaaw para iti grupo nga Alliance for Concerned Teachers Partylist a naibutaktak dagiti ma-anomalya a flood control projects agsipud ta idi paylaeng ket ammo daitoyen iti gobierno ngem saan laeng a maik-ikkan iti umdas a panawen a matingiting dagiti proyekto a naited kadagiti contractors.
Segun kenni sigud nga ACT partylist representative a ni France Castro, makapaliday a maamwan nga aganay 60% ti pondo pang-imprastraktura kas kadaitoy a proyekto ket naiturong laeng kadagiti korap a kontratista.
Uray iti singasing a pondo para ti tawen 2026 ket dakkel latta ti porsyento ti naitukon para kadagiti flood control projects a mabalin pay kuma kunana a mausar kadagiti sabali a proyekto.
Innayon ni Castro a maibilang kas arapaap laengen a magun-od ti Pilipinas iti “middle-income economy” nu awan met iti nasayaat a pagbanbanagan iti pondo ti pagilian.
Iti agdama ket itantandudo iti grupo ti kaadda iti Independent People’s Audit tapno matingiting a nasayaat dagiti proyekto a pinodoan ti gobierno tapno masiguro nga usto iti pagturturongan ti buis dagiti Pilipino.
Mangnamanama isuna nga itultuloy ni Presidente Ferdinand Marcos Junior ti panangsukimat kadagiti maanomalya a proyekto nu kasta ket mapagsungbat dagiti abusado a kontratista ken opisyales ti gobierno nga adda pakainagan na kadagitoy.
